نور الدين بازين
هاد العام عيد الأضحى دخل للمغاربة بحال شي فيلم ديال التهريب الدولي.
الحولي ما بقاش خروف… ولى “سلعة حساسة”، تباع بالهاتف، وتتخبّى أكثر من الحشيش ومالبورو.
تمشي للسوق تلقى المواطن داير يديه فجيبو، كيشوف فالحولي بحال شي واحد داخل يشري شقة فكاليفورنيا.
يسول الشناق:
“بشحال هادا؟”
يعاود ليه الشناق وهو نافخ صدرو:
“آش بغيتي نتا؟ الجودة كتخلص.”
الجودة؟!
راه غير حولي ماشي طائرة F16.
والشناقة هاد العام داخلين فورما لا مثيل لها.
التلفونات شاعلة أكثر من السنترالات ديال شركات الاتصال.
“آلو… عندك البركي؟”
“كاين… ولكن خاصك تحجز من دابا.”
“والصردي؟”
“هاد الصباح خرج كامل!”
بحال إلى الناس كيتاجرو فالبورصة الدولية ماشي فالخرفان.
حتى اللغة تبدلات.
زمان كانوا كيقولو: “هاد الحولي زوين.”
دابا ولاو:
“هاد السلعة نقية.”
“هاد النوع داخل من الجبل.”
“هاد البركي ما كيبانش فالسوق.”
بحال شي شبكة تهريب عابرة للقارات.
أما المواطن المسكين، راه دخل فمرحلة نفسية صعيبة.
واحد بدا كيقلب غير على تصويره مع الحولي ديال الجيران باش يحطها فالفيسبوك ويحافظ على الكرامة الاجتماعية.
واحد آخر قال لمراتو:
“هاد العام نديرو النية ونشريو غير الكفتة.”
والأطفال ولاو كيشوفو الخروف بحال الديناصورات: كائنات كانت موجودة زمان.
والحكومة؟
الحكومة ساكتة بطريقة تثير الإعجاب العلمي.
لا خرجات تهضر، لا فسّرت، لا هضرت على المراقبة، لا على الشناقة، لا على الأسعار.
دايرة بحال التلميذ اللي ما حافظش الدرس وكيتسنا الجرس يدقّ.
المغاربة كاملين كيسبّو فالفيسبوك، فالأسواق، فالطاكسيات، فالقهاوي… والحكومة باقية كتمارس رياضة الصمت الأولمبي.
حتى ولا المواطن بدا يتساءل:
“واش الحكومة فاهمة ودايرة الطم؟ ولا هرب عليها الشغل؟”
لأن اللي واقع ماشي سوق أضاحي… اللي واقع مهرجان وطني للسمسرة.
الشناق ولى أهم من الطبيب والمهندس.
واحد شاد واتساب، حاطي صورة حولي، وكاتب:
“اللي بغا يتاصل فالخاص.”
بحال إلى كيهرب الذهب الإفريقي.
والمضحك المبكي أن الحكومة خلاّت المواطن يواجه الشناق وجهاً لوجه، بلا حماية، بلا مراقبة، بلا حتى كلمة تطمّن الناس.
النتيجة؟
الشناق كيزيد الثمن كل صباح، والمواطن كيزيد الضغط والسكر كل مساء.
هاد العام فعلاً ما بقاش عيد الأضحى…
ولى موسم الرعب الاقتصادي.
والحولي ولى كونطربوند رسمي، خاصو ربما فالمستقبل رخصة تنقل، ومرافقة أمنية، وتصريح جمركي قبل ما يدخل الرحبة.
