هيئة التحرير
في مشهد ما بين الكوميديا السوداء ومسرح العبث، تحوّلت دورة مجلس جماعة سعادة ضواحي مراكش إلى حصة “علاج”، ماشي بالنقاش السياسي ولا بتقييم برنامج العمل، ولكن بـ“الطابلة والصداع”.
المستشار الجماعي هشام بن مومنة، وهو كيقرا تقييم برنامج عمل الجماعة، كان باغي يدير واحد الخدمة عادية: يعرض الأرقام، يشرح الحصيلة، ويفتح النقاش. ولكن اللي وقع ما كانش فالحسبان… بعض الأعضاء والعضوات قرروا يدخلوا فـ“إيقاع جماعي”، بالضرب على الطاولة والصراخ، وكأن القاعة ولات حلقة ديال “الذكر” ماشي مؤسسة منتخبة.
الفيديو اللي توثق للحادثة ما خلا حتى شي مجال للتأويل: تشويش واضح، مقاطعة مباشرة، ومحاولة لإسكات صوت كيحاول يهضر بالأرقام والمعطيات. وكأن التقييم ولى جريمة، والكلمة الحرة خاصها “تدوز فالصمت”.
أما بن مومنة، فاختار يرد بطريقته… سخرية لاذعة فيها شوية ديال الألم: قال باللي اللي كانوا كيضربو فالطاولة ويصرخو، كانو كيبانو بحال إلى كيقرا عليهم “الرقية الشرعية” باش يخرج داك “المس” اللي فيهم.
التعليق ماشي غير نكتة، بل كيعري واحد الواقع: ملي كيولي النقاش داخل المجالس المنتخبة مزعج لبعض الأطراف، كيتحوّل الصداع لوسيلة سياسية، والطاولة لآلة قمع.
السؤال اللي كيبقى مطروح:
واش فعلاً التقييم كيخوّف لهد الدرجة؟ ولا المشكل ماشي فالتقييم… ولكن فداك الشي اللي ممكن يبان فيه؟
فجماعة سعادة، يبدو أن بعض المنتخبين مازال ما اقتنعوش أن الديمقراطية ماشي هي “اللي يطلع صوتو أكثر هو اللي يربح”، بل هي القدرة على الاستماع، الرد، وتحمل النقد… بلا طابلة، بلا صراخ، وبلا “مس جماعي”.
